«Մենք ոչինչ ունինք բանակցութիւններու սեղանին շուրջ ներկայացնելու` բացի թափանցիկութենէն»,
ըսած է Ռուհանի:
«ՌԻԱ Նովոսթի» լրատու գործակալութիւնը կը հաղորդէ, որ Իրանի նախագահ Հասան Ռուհանի յայտարարած
է, որ Իրան պատրաստ է հիւլէական թղթածրարին շուրջ «վեցեակ»-ին հետ նախատեսուած բանակցութիւններուն
մէջ ցուցաբերել անկեղծութիւն: «Մենք ոչինչ ունինք բանակցութիւններու սեղանին շուրջ
ներկայացնելու` բացի թափանցիկութենէն», ըսած է Ռուհանի: «Վեցեակ»-ի (Ռուսիա, Բրիտանիա,
Գերմանիա, Չինաստան, Միացեալ Նահանգներ եւ Ֆրանսա) եւ Իրանի միջեւ բանակցութիւններու
4-րդ փուլը տեղի պիտի ունենայ Վիեննայի մէջ 13-16 մայիսին: Միւս կողմէ, Իրանի գերագոյն
հոգեւոր պետ այաթոլլա Ալի Խամենէի վստահեցուց, որ «իրանեան հրթիռային ծրագիրը սանձել
նախատեսելը թշնամիին համար անմտութիւն պիտի ըլլայ»: Ան կոչ ուղղեց «երկրին կարիքները
եւ հիւլէական բանակցութիւններուն մէջ պարտադրուած պատժամիջոցները իրարու չկապելու»: Խամենէի
Իրանի Յեղափոխական պահակագունդի օդատիեզերական ուժերու հրամանատարութեան կեդրոն իր այցելութեան
ընթացքին հրամայեց մեծ քանակութեամբ հրթիռներ արտադրել: